Mesazhi i Sekretarit të Përgjithshëm në Ditën Ndërkombëtare Kundër Gjuhës së Urrejtjes

Gjuha e urrejtjes është hapi i parë drejt dehumanizimit, një rrugë që shumë shpesh çon në dhunë, konflikt dhe krime mizorie. Ajo është një mjet përçarjeje që vë në shënjestër grupe të caktuara — përfshirë gratë, migrantët, refugjatët, personat LGBTQIA+, personat me aftësi të kufizuara dhe shumë pakica të tjera — shpesh për përfitime politike.

Në epokën tonë digjitale, gjuha e urrejtjes përhapet më shpejt se kurrë, e amplifikuar nga platforma të parregulluara dhe e intensifikuar nga inteligjenca artificiale. Shumë algoritme shpërblejnë indinjatën dhe përçarjen, duke nxitur gënjeshtrat për pëlqime dhe duke promovuar dhunën për shikime. Anonimiteti në internet gjithashtu e bën më të vështirë që autorët të mbahen përgjegjës.

Por zgjidhjet praktike mund ta ndërpresin këtë cikël të rrezikshëm: nga edukimi për të njohur dhe refuzuar gjuhën e urrejtjes; te mbështetja për ata që vihen në shënjestër të abuzimit; e deri te ndërhyrjet më të forta nga qeveritë dhe kompanitë e teknologjisë. Shtetet kanë detyrime të qarta sipas së drejtës ndërkombëtare për të luftuar nxitjen e urrejtjes dhe për të promovuar përfshirjen, respektin për diversitetin dhe solidaritetin. Në të njëjtën kohë, liria e shprehjes nuk duhet të përdoret kurrë si justifikim për mesazhe të dëmshme.

Strategjia dhe Plani i Veprimit i Kombeve të Bashkuara për Gjuhën e Urrejtjes tregojnë rrugën përpara, ndërsa Parimet Globale për Integritetin e Informacionit ofrojnë një udhërrëfyes drejt një ekosistemi digjital më të sigurt dhe më etik.

Në këtë Ditë Ndërkombëtare Kundër Gjuhës së Urrejtjes, le të refuzojmë paragjykimin në të gjitha format e tij dhe të punojmë së bashku për të ndërtuar një botë të bazuar në të drejtat e njeriut, dinjitetin dhe respektin.