Fjalimi i Koordinatorit të Përhershëm të OKB-së, Brian J. Williams, gjatë ceremonisë së nënshkrimit të ndihmës së BE-së për të luftuar COVID-19 në Shqipëri

Faleminderit Ambasador Soreca. 

E nderuar Ministre Manastirliu,

Të martën e kësaj jave, Sekretari i Përgjithshëm i OKB-së prezantoi një raport global për Covid-19. Ai theksoi natyrën e paprecentë globale të krizës, dhe rrezikun që ajo mbart për jetën e njerëzve tani, dhe për zhvillimin – dhe arritjen e OZHQ-ve – në vitet pasardhëse.

Gjatë prezantimit të raportit, ai theksoi se ne jemi po aq të fortë sa sistemi më i dobët shëndetësor në botën tonë të ndërlidhur... dhe ajo që i nevojitet më shumë botës tani është solidariteti.

Niveli i këtij solidariteti duhet të jetë në përputhje me shkallën e krizës, u shpreh ai. Ai duhet të jetë shumëpalësh, i koordinuar dhe i përmasave të mëdha, me vende që tregojnë solidaritet për komunitetet dhe kombet më të cenueshme. 

Ai ishte i drejtpërdrejtë në fjalët e tij. Për të adresuar Covid-19, botës i duhet një përgjigje në masën 10% të PBB-së botërore.

Jam i kënaqur të jem sot këtu për të vënë në praktikë këtë thirrje.

BE-ja – edhe një herë faleminderit Ambasador Soreca për lidershipin tuaj – ka treguar solidaritetin e saj me Shqipërinë dhe Ballkanin Perëndimor, dhe lidership për veprim shumëpalësh të koordinuar, duke akorduar me shpejtësi burime për të forcuar përgjigjen e Shqipërisë.

Për pjesën e saj, Qeveria e Shqipërisë duhet përgëzuar për masat e saj të shpejta dhe të forta për të zbatuar distancimin fizik, për të kryer testimin e shëndetit publik dhe gjurmimin e kontakteve, për të përgatitur strukturat mjekësore, dhe për të komunikuar informacion kritik te publiku, të gjitha me qëllim “uljen e kurbës”. Përgëzime Ministres Manastirliu dhe Kryeministrit, si dhe pjesës tjetër të qeverisë për lidershipin tuaj kolektiv. 

Kombet e Bashkuara në Shqipëri i kanë mbështetur fuqishëm këto masa, dhe do të vazhdojnë ta bëjnë këtë. Ulja e kurbës do të thotë pak më shumë kohë për Shqipërinë – pak më shumë kohë kritike që ajo mund ta përdorë për të forcuar sistemet e saj mjekësore që të jenë edhe më të përgatitura. Prandaj, mbështetja nga BE-ja është fiks në kohë.

Kombet e Bashkuara janë të kënaqura të mbështetin Ministrinë e Shëndetësisë dhe Mbrojtjes Sociale në përpjekjet e saj. UNOPS – i njohur në nivel global për kapacitetin e tij logjistik dhe prokurues – është angazhuar me asistencë në të gjithë nënrajonin. 

Kolegia ime, Znj. Freya von Groote, Drejtoresha e Zyrës në Vjenë për Zyrën e Kombeve të Bashkuara për Shërbime Projekti, nuk mund të ishte sot këtu për shkak të Covid-19, por më lejoi që të shpreh në emër të saj angazhimin e plotë të UNOPS-it për të punuar sa më shpejt që të jetë e mundur në aspektin njerëzor në këto rrethana lidhur me këtë pajisje jetike.

Në fakt, ai është një partneritet nga ana e OKB-së, me Organizatën Botërore të Shëndetësisë që shoqëron edhe Ministrinë e Shëndetësisë në përpjekjet e saj për t’iu përshtatur ditë pas dite nevojave të ndryshueshme për të mbrojtur qytetarët shqiptarë nga Covid-19. 

Janë pikërisht partneritete të tilla, falë të cilave njerëzimi mund të bëhet bashkë dhe të mbrojë veten nga Covid-19. 

Mezi po presim ta vëmë në zbatim këtë partneritet.