FAO - Ministria e Bujqësisë dhe Universiteti Bujqësor i Tiranës bashkojnë forcat për të mbështetur të rinjtë drejt transformimit dixhital të bujqësisë

Në takimin e zhvilluar në mjediset e Ministrisë së Bujqësisë dhe Zhvillimit Rural, ku morën pjesë akademikë, studentë, sipërmarrës, dhe drejtues të Përfaqësisë së FAO-s në Shqipëri, ministrja Frida Krifca theksoi potencialin e sektorit të agroindustrisë në ekonominë e vendit dhe mundësitë e punësimit në zonat rurale të Shqipërisë.

“Me këtë synim dhe frymëzim, sot shpallim nismën tonë më të re”, theksoi ministri Krifca, “Kyprogram vjen në bashkëpunim me Organizatën e Kombeve të Bashkuara për Ushqimin dhe Bujqësinë, veçanërisht nga Drejtori i Përgjithshëm i FAO-s, QU Dongyu, i cili vizitoi Shqipërinë disa javë më parë. Bashkë me Universitetin Bujqësor të Tiranës u vendos që të ndërtohet ky program”, tha ministrja Krifca.

“Ky program i shkurtër trajnimi u ofron sipërmarrësve të rinj aftësitë që u nevojiten për të dixhitalizuar modelet e tyre të ardhshme të agrobiznesit. Do të ofrojë gjithashtu mundësinë për t'u lidhur me profesionistë me përvojë në industri dhe për të fituar njohuri të vlefshme për sfidat dhe mundësitë me të cilat përballen”, shtoi Tiphaine Lucas, Koordinatore e Programit të FAO-s në Shqipëri.



Sipas ministres, “ky program integron dy nga objektivat më thelbësore: së pari, integrimin e brezit të ri në sektorin e bujqësisë, ngritjen e kapaciteteve në qasje teorike dhe praktike për të bërë biznesin e tyre të suksesshëm dhe së dyti, komponentin e forcimit të dixhitalizimit në bujqësi”.

Programi do të zhvillohet në 13 mars. Ftohen të gjithë studentët e Universitetit Bujqësor të Tiranës të aplikojnë nga data 15 shkurt deri më 1 mars, duke paraqitur një letër motivimi dhe një CV në adresën: terinjtenebujqesi@bujqesia.gov.al