Shqipëria, Zvicra dhe OKB-ja së bashku për mbështetjen e prioriteteve të OKB-së në Shqipëri

Ngjarja mblodhi ambasadorët e trupit diplomatik në Shqipëri dhe përfaqësues të lartë të qeverisë për një shkëmbim mbi mënyrën se si reforma e OKB‑së çon në përmirësime konkrete në nivel vendor. Shqipëria u theksua si një shembull praktik se si një sistem i OKB‑së më i koordinuar dhe i përqendruar mund t’u përgjigjet më mirë prioriteteve kombëtare dhe të japë rezultate më të forta.

Në fjalën e saj hapëse, Zëvendëskryeministrja Shkëlqesia e Saj Albana Koçiu theksoi partneritetin afatgjatë të Shqipërisë me Kombet e Bashkuara dhe rëndësinë e koordinimit efektiv në nivel vendor. Ajo vuri në dukje se “standardet e promovuara përmes procesit OKB-80, përkatësisht: institucione më të forta, qeverisje më e mirë, përfshirje, qëndrueshmëri dhe të drejta të njeriut, janë të njëjtat standarde që udhëheqin rrugën tonë të integrimit evropian”.

Ajo nënvizoi se “përvoja e Shqipërisë dëshmon vlerën e mbështetjes së koordinuar nga OKB‑ja. Qasjet e integruara dhe të bashkuara kanë rezultuar shumë më efektive sesa ndërhyrjet e izoluara, një mësim që është i rëndësishëm në të gjitha politikat publike dhe lidhet drejtpërdrejt me diskutimet në vijim mbi reformën e OKB‑së”.

Duke prezantuar “OKB në nivel vendor – Një udhëzues praktik”, Shkëlqesia e Saj Ruth Huber, Ambasadore e Zvicrës në Shqipëri, theksoi vlerën e këtij publikimi si një mjet praktik për diplomatët dhe ekipet e bashkëpunimit ndërkombëtar.

“Zvicra është një mbështetëse e fortë e multilateralizmit në përgjithësi dhe e OKB‑së në veçanti. Si pjesë e kësaj mbështetjeje, ministria jonë e jashtme ka prodhuar këtë manual që shpjegon se si funksionon në të vërtetë OKB‑ja ‘në terren’. Vlera e tij qëndron në thjeshtimin dhe sqarimin e mënyrës se si funksionon OKB‑ja në praktikë. Jo vetëm publiku i gjerë, por edhe diplomatët, zyrtarët qeveritarë, profesionistët e zhvillimit dhe mediat, do të kuptojnë qartë se si është e organizuar OKB‑ja dhe si ajo realizon punën e saj zhvillimore dhe humanitare”, tha Ambasadorja zvicerane.

Në prezantimin e saj mbi OKB-80, Dr. Ingrid Macdonald, Koordinatore e Përhershme e Kombeve të Bashkuara në Shqipëri, theksoi se si reformat në të gjithë sistemin po përkthehen në ndryshime konkrete në vend:

“Në Shqipëri, ekipi i Kombeve të Bashkuara po thjeshton mënyrën e punës, duke prioritarizuar fushat ku ekspertiza e OKB‑së sjell vlerën më të madhe dhe duke ofruar mbështetje më të integruar dhe të fokusuar në rezultate, në partneritet të ngushtë me Qeverinë.”

Ajo shtoi gjithashtu se “Korniza e re e Bashkëpunimit Shqipëri–OKB 2027–2031 ofron një plan të qartë dhe të përqendruar, duke prioritizuar tre shtylla strategjike: Zhvillimi gjithëpërfshirës i kapitalit njerëzor; Transformimi ekonomik i qëndrueshëm; dhe Qeverisja, drejtësia dhe të drejtat e njeriut. Përmes kësaj kornize të përbashkët OKB‑Qeveri, OKB angazhohet të ofrojë zgjidhje më të fokusuara, koherente dhe me ndikim më të lartë si një partner i vërtetë në zhvillimin e Shqipërisë dhe në rrugën e saj drejt reformave për anëtarësimin në BE.”

Shkëlqesia e Tij Silvio Gonzato, Ambasador i Bashkimit Evropian në Shqipëri, theksoi:
“Bashkimi Evropian mbetet i palëkundur në angazhimin e tij për të mbështetur multilateralizmin dhe rendin ndërkombëtar të bazuar në rregulla, me Organizatën e Kombeve të Bashkuara në qendër të tij. Mbështetja e Kombeve të Bashkuara është një domosdoshmëri strategjike. Ne duhet të riafirmojmë jo vetëm angazhimin tonë ndaj Kombeve të Bashkuara, por edhe parimet që frymëzuan krijimin e saj: paqen, bashkëpunimin, solidaritetin dhe të drejtat e njeriut.”

Pjesëmarrësit e mirëpritën Udhëzuesin Praktik si një burim të dobishëm në një kohë kur ka një kërkesë në rritje për bashkëpunim ndërkombëtar më efektiv. Diskutimet theksuan se reforma e OKB‑së ka më shumë rëndësi kur përmirëson mënyrën se si ofrohet mbështetja në praktikë — përmes mënyrave më të thjeshta të punës, prioriteteve më të qarta dhe koordinimit më të mirë — me Shqipërinë që ofron një shembull të fortë të kësaj në veprim.

Takimi u mbyll me mesazhin se bashkëpunimi më i fortë i udhëhequr nga vetë Shqipëria, vendosja e prioriteteve më të qarta dhe mbështetja më e koordinuar janë çelësi për të dhënë rezultate reale për njerëzit në Shqipëri.

Për të mësuar më shumë ose për të porositur një kopje të “OKB në nivel vendor – Një udhëzues praktik”, vizitoni: www.understandingtheun.org

Për më shumë informacion mbi Nismën UN80 (OKB-80), ju lutemi vizitoni: https://www.un.org/un80-initiative/en