Vodafone angazhohet të punojë me agjencitë e OKB-së për të mbështetur Objektivat e Zhvillimit të Qëndrueshëm në Shqipëri

Koordinatorja e Përhershme e OKB-së në Shqipëri, Znj. Fiona McCluney, dhe Drejtoresha Ekzekutive e Vodafone Albania, Katia Stathaki, kanë nënshkruar një marrëveshje bashkëpunimi që mbështet përpjekjen e Shqipërisë për të përmbushur Objektivat e Zhvillimit të Qëndrueshëm.

“Deklarata e Përbashkët e Qëllimit lidhur me bashkëpunimin për përmbushjen e Axhendës 2030 për Zhvillimin e Qëndrueshëm në Shqipëri” parashikon një partneritet strategjik, i cili përqendrohet te disa nga çështjet më të ngutshme që duhen trajtuar në nivel global, nga varfëria, klima, mbrojtja mjedisore, shëndeti te dhuna me bazë gjinore.

Kombet e Bashkuara në Shqipëri punojnë me qeverinë e vendit dhe me një larmi partnerësh për zhvillim, duke përfshirë sektorin privat, për të maksimizuar mbështetjen dhe për të përshpejtuar zbatimin e angazhimeve të Shqipërisë për 17 Objektivat e Zhvillimit të Qëndrueshëm, të cilat u miratuan nga komuniteti ndërkombëtar në vitin 2015.

Në fjalën e saj për mediat gjatë aktivitetit të nënshkrimit, Znj. McCluney theksoi rolin e rëndësishëm që ka bashkëpunimi me sektorin privat, sidomos përballë sfidave që ka sjellë pandemia.

“Ne jetojmë në kohë të pazakonta dhe pandemia e Covid-19 po na mëson se sfidat globale mund të trajtohen dhe kapërcehen vetëm nëpërmjet veprimit të koordinuar. Biznesi është një partner jetik i OKB-së për arritjen e 17 Objektivave të Zhvillimit të Qëndrueshëm, të cilat bëjnë shprehimisht thirrje dhe paraqesin një mundësi për sektorin privat që të aplikojë krijimtarinë, novacionin dhe financimin e tyre për të adresuar sfidat më të mëdha të zhvillimit të qëndrueshëm,” u shpreh Znj. McCluney.

Znj. Stathaki shprehu optimizmin e saj për rolin që mund të luajë teknologjia në arritjen e Objektivave të Zhvillimit të Qëndrueshëm dhe në luftën kundër problemeve më të mëdha me të cilat përballet bota sot, duke përfshirë edhe Shqipërinë.

“Në emër të Vodafone Albania, dëshiroj të shpreh krenarinë time që sot po nënshkruajmë këtë marrëveshje me Kombet e Bashkuara në Shqipëri. Teknologjia mund të ndihmojë për reduktimin e pabarazive duke ofruar akses te shërbimet bazë, si e-shëndeti ose arsimi online. Ajo mund të përdoret edhe nga qeveritë për të rrjetëzuar qytetarët nëpërmjet instrumenteve e-qeverisja dhe për të përmirësuar angazhimin e palëve të interesit dhe menaxhimin e informacionit. Ne besojmë vërtet se teknologjia e Vodafone mund të vihet në dispozicion të qytetarëve shqiptarë për të arritur bashkërisht Objektivat e Zhvillimit të Qëndrueshëm,” u shpreh Znj. Stathaki.

Si pjesë e marrëveshjes, Vodafone Albania angazhohet të ofrojë produkte teknologjike dhe të Internetit të Gjërave (IoT) për të ndihmuar agjencitë e OKB-së në Shqipëri në realizimin e zhvillimit të qëndrueshëm. Në fjalimet e përfaqësuesve të Vodafone, ky angazhim u shtohet investimeve që shoqëria ka ndërmarrë në fushata dhe iniciativa me ndikim social, nga mjedisi dhe ekonomia, te përpjekjet për të ndaluar dhunën ndaj grave.